మరోసారి ఓడించాలని ఉంది.. షోయబ్ అక్తర్

టీ 20 వరల్డ్ కప్‌లో పాక్ చేతిలో భారత్ ఓటమి బాధ ఇంకా వెంటాడుతూనే ఉంది. న్యూజిల్యాండ్ చేతిలోనూ ఓటమి చెందడంతో దెబ్బ మీద దెబ్బ పడ్డట్టు అయింది. ఆఫ్గాన్‌ను భారత్ చిత్తు చేసినా కూడా ఆ విజయాన్ని ఆస్వాధించడం లేదు. అయితే పాక్ మాత్రం భారత్‌ను కవ్వించేందుకు బాగానే ప్రయత్నిస్తోంది. మరోసారి ఇండియాను ఓడించాలనే ఆత్రుతగా ఉందన్నట్టుగా, ఫైనల్‌లో ఇండియా మళ్లీ మాకు మౌకా (అవకాశం) ఇవ్వాలని కోరుతున్నామంటూ పాక్ మాజీ క్రికెట్ షోయబ్ కౌంటర్లు వేశాడు.

పాక్ పై భారత్ రికార్డును దృష్టిలో ఉంచుకుని క్రికెట్ మ్యాచ్ ల ప్రసారకర్తలు కొంతకాలంగా ‘మౌకా మౌకా’ పేరిట వాణిజ్య ప్రకటనలు రూపొందిస్తున్న సంగతి తెలిసిందే. అయితే ఇది తమ దేశాన్ని కించపరిచేలా ఉండేదని, కానీ ఇప్పుడు పరిస్థితి మారిందని, ఇకపై ఆ పదం మాకు ఎంటర్టైన్మెంట్‌గా మారిందని షోయబ్ అన్నాడు. టీ20 వరల్డ్ కప్ ఫైనల్స్ కు టీమిండియా అర్హత సాధించాలని, అక్కడ మరోసారి పాకిస్థానే గెలవాలని కోరుకుంటున్నట్టు షోయబ్ చెప్పుకొచ్చాడు.